У Германіі затрымалі першага "кліматычнага п'яніцу"

У Германіі апошнім часам актывізаваліся кліматычныя актывісты, якія прыклейваюць сябе да дарог і машын, каб перакрыць рух. Так яны хочуць звярнуць увагу на праблемы экалогіі. Нядаўна на баварскім курорце Гарміш-Партэнкірхен затрымалі 45-гадовага мужчыну, які правёў аналагічную акцыю, але ў новым фармаце. Ён паставіў пасярод дарогі крэсла, сеў на яго і стаў піць піва.

На месца прыехалі паліцэйскія, якія рыхтаваліся адклейваць парушальніка ад дарогі. Але аказалася, што ён зусім не быў прыклеяны, а проста сядзеў і піў піва. Мужчыну затрымалі і змясцілі ў турму. BILD называе яго "першым у Германіі кліматычным п'яніцам". Мужчыну абвінавачваюць у тым, што ён перакрыў рух, абражаў кіроўцаў і паказваў ім сярэдні палец. Адвакат затрыманага кажа, што "гэта было не парушэнне парадку, а акцыя пратэсту". Такім чынам ён выступаў "супраць засілля аўтамабіляў" і занадта шчыльнага руху.