У Мінгарвыканкам падалі адзіную заяўку на Дзень Волі
Заяўкі на правядзенне двух розных шэсцяў, што падаваліся раней, былі сёння адкліканыя. Арганізатары змаглі дамовіцца наконт адзінства дзеянняў.
"Пададзены добры сігнал беларускаму грамадству, што апазіцыя і беларускія дэмакратычныя сілы здольныя да аб'яднання дзеля супольных дзеянняў. Ёсць разуменне таго, што цяпер не час для палітычнага піяру і акцыя 25 сакавіка — не тая акцыя, якая магла бы стаць прадметам для палітычных спрэчак", — так пракаментаваў гэтае рашэнне для Радыё "Рацыя" сустаршыня Беларускай хрысціянскай дэмакратыі Віталь Рымашэўскі.
Мяркуецца, што падчас мітынгу і шэсця асноўнымі лозунгамі будуць патрабаванні вызвалення палітзняволеных і адстаўкі Аляксандра Лукашэнкі. Вырашана, што Дзень Волі пройдзе выключна пад бел-чырвона-белымі сцягамі, без сімволікі партый, рухаў і арганізацый, якія ў ім бяруць удзел.
