У Прыднястроўі абстралялі будынак Міністэрства дзяржбяспекі
У непрызнаным Прыднястроўі нехта абстраляў з гранатамётаў будынак Міністэрства дзяржаўнай бяспекі. Тамтэйшыя СМІ пішуць пра серыю выбухаў у Тыраспалі — адміністрацыйным цэнтры рэгіёна.
У будынку Міністэрства дзяржбяспекі адбылося некалькі выбухаў пасля стральбы з ручнога супрацьтанкавага гранатамёта, піша newsmaker.md са спасылкай на Міністэрства ўнутраных спраў Прыднястроўя.
"Выбітыя вокны на верхніх паверхах. З памяшканняў валіць дым. Прылеглая тэрыторыя ачэпленая супрацоўнікамі міліцыі. На месцы следча-аператыўная група, сапёры, пажарныя, дактары хуткай дапамогі і спецыялісты іншых экстраных службаў", — заявілі ў МУС. Пацярпелых пры здарэнні няма.
Па словах відавочцаў, выбух было чуваць за некалькі кварталаў. У суседніх з міністэрствам будынках выбіла шыбы.
