У Смалявічах турэцкая фірма “кінула” дольнікаў

Пра гэта Еўрарадыё распавялі самі дольнікі.

Надзея: “Дом будуецца з 2005 года. У верасні яны мусілі здаць дом, але цяпер там толькі 3 паверхі. А павінна быць 6. Стаіць дом, развальваецца, рабуецца. Туркі з'ехалі, ніхто не прыняў гэты дом, ён не ахоўваўся, развальваўся, людзі сталі красці — прыязджалі, набіралі цэглу. І нікому не было справы. Усе правы па дамове мы перадалі ва Ўпраўленне камунальнага будаўніцтва. Тут самая непасрэдная віна УКБ”.

Турэцкі падрадчык з'ехаў без тлумачэння прычын, і цяпер з гэтай нагоды вядзецца расследаванне, паведаміў Еўрарадыё начальнік Упраўлення камунальнага будаўніцтва райвыканкама:

"Без тлумачэнняў прычын з'ехаў — і ўсё. Будзем высвятляць; мне самому цікава, чаму".

Згодна са словамі чыноўніка, сёння разглядаюцца дзве арганізацыі, якія змогуць дабудаваць шматпавярховік:

"…”Будмастрэст” і “Аслябя”. Мы прапанавалі гэтыя арганізацыі жыллёва-камунальнаму кааператыву, а яны ўжо паміж сабой павінны ўзгадніць падрадную арганізацыю".

Старшыня жыллёва-будаўнічага кааператыва №11 кажа, што, магчыма, дом здадуць да чэрвеня 2011 года:

“Я думаю, што нас пачулі: знайшліся жадаючыя нам пабудаваць. Яны паабяцалі, што калі ўсё будзе добра з фінансаваннем, то яны здадуць дом да канца ІІ квартала, то бок да чэрвеня наступнага года. Гэта нас трошку абнадзеіла”.

Але як кажа старшыня кааператыва, пры любым раскладзе дольнікі згубяць грошы:

“Вядома, губляем… Так ці інакш, курс расце, квадратны метр расце. Канец будаўніцтва мусіў быць у верасні — а ўжо амаль лістапад. Два месяцы мы ўжо згубілі... Хтосьці спадзяваўся ўжо засяліцца ў верасні, а даводзіцца здымаць кватэру”.

У тым, што здарылася, жыхары абвінавачваюць Упраўленне камунальнага будаўніцтва і збіраюцца падаваць на яго ў суд, кажа Надзея:

"Мы ўжо грукаліся паўсюль—– Генпракуратура, адміністрацыя, аблвыканкам, райвыканкам. Нідзе не маглі нічога прабіць. Усе гэтыя лісты цяпер ляжаць у райвыканкаме.
Самы непасрэдны вінаваты — гэта наш УКБ. Бо лічылася, што яно павінна наймаць падрадчыка, яно забрала нашыя грошы паводле дамовы... Мы маем намер судзіцца з Упраўленнем капітальнага будаўніцтва. За зрыў тэрмінаў і невыкананне ўмоў дамовы".

Падманутыя жыхары нават падалі заяўку на правядзенне мітынгу ў цэнтры Смалявічаў на 13 лістапада. Раней у горадзе з насельніцтвам у 14 тысяч такога ніколі не было!

Надзея: "Хацелі нават ладзіць мітынг — напісалі заяву, мінулі 2 тыдні, выканкам адказу не даў. Цяпер напісалі другую заяву з вызначаным месцам, датай і г.д. Людзі злыя. Шматдзетныя сем'і, жывуць у бараках".

Заява пакуль яшчэ знаходзіцца ў выканкаме, але, магчыма, калі да гэтага часу штосьці вырашыцца, людзі яе адклічуць.