Варшава адсвяткавала незалежнасць маршамі пратэсту

У чацьвер зранку польская сталіца нібы вымерла: вялікае свята Незалежнасці і ажно 3 выходных за ім. Але бліжэй да абеду на вуліцах з'явіліся людзі з нацыянальнымі сцягамі, таксама сцягі вывесілі людзі з вокан сваіх кватэр, па цэнтральных вуліцах ездзіў гістарычны трамвай, прайшоў гістарычны парад, мноства выставаў і канцэртаў. Акрамя гэтага прайшоў ХХІІ «Забег Незалежнасці»: жывая рака з 7 тысяч удзельнікаў ўтварыла сабой даўгі нацыянальны сцяг, бо ўдзельнікі былі ў вопратцы белага і чырвонага колераў. Дыстанцыя забегу склала 10 кіламетраў і праходзіла па цэнтры Варшавы.

Дзень Незалежнасці польсая сталіца адсвяткавала дэмакратычна: адразу двума маршамі. На Замкавай плошчы сустрэліся прадстаўнікі нацыяналістычных арганізацый Польшчы, каб правесці марш нацыяналістаў, а ў супрацьвагу да яго на іншым баку плошчы з'явіліся людзі з расцяжкай «Фашызм ня пройдзе!». Чакалася, што ў сталіцы можа быць вельмі горача, было сцягнута шмат паліцыі, у тым ліку коннай, на паліцыянтах былі балоны са слезатачывым газам, а сілы бакоў былі амаль роўныя. Але ў выніку нацыяналістычны марш пайшоў іншым маршрутам, затрымана 33 чалавекі, а за ходам марша можна было сачыць у твітэры па хэштэгу #11listopada.