Вазок ад Маргенштэрна і віно праз Інтэрнет: толькі добрыя навіны
Лыжка мёду на Еўрарадыё
Рэпер Маргенштэрн падарыў падлетку сваю інвалідны вазок, а Мінфін Расіі прапанаваў прадаваць людзям айчыннае віно праз Інтэрнэт.
Падобна да таго, федэрацыя ператвараецца ў "краіну для жыцця": нават дзве індыйскія цыркавыя сланіхі адправіліся на горны курорт у Сочы, каб правесці там заслужаны адпачынак.
Якія каманды выконвае кітайскі сабака-робат і чым цікавы фестываль Open House ў Празе?
Пра гэта і не толькі — у аглядзе самых добрых, смешных, а часам абсурдных навін на Еўрарадыё.
Калі не даюць завесці сабаку
Xiaomi паказала свайго першага чацвераногага робата CyberDog.
Прылада рэагуе на голас, выконвае каманды, ідзе за гаспадаром і робіць сальта назад. У дадатак робапёс можа ствараць навігацыйныя карты, вызначаць месца прызначэння і пазбягаць перашкод.
Вага CyberDog — 3 кілаграмы. Ён здольны бегаць з хуткасцю да 12 кіламетраў за гадзіну. Сабака таксама атрымаў датчыкі і камеры, якія дапамагаюць яму перамяшчацца ў напалову аўтаномным рэжыме.
So, who wanted to see @Xiaomi's #CyberDog do a backflip? pic.twitter.com/GUBySGqxuY
— Daniel D (@Daniel_in_HD) August 10, 2021
Вазок ад Маргенштэрна
Расійскі падлетак з інваліднасцю Цімур Андрушын атрымаў вазок ад рэпера Маргенштэрна. Музыка з'яўляўся на ім падчас "Прэміі "Муз-ТВ".
15-гадовы фанат пакутуе на скаліёз чацвёртай стадыі. Праз гэта ён на ўсё жыццё прыкаваны да інваліднага вазка.
Адпачынак — сланам!
Індыйскія сланіхі — 30-гадовая Прэці і 15-гадовая Марго — бавяць свой адпачынак на горным курорце ў Сочы. Расійскі дзяржаўны цырк адправіў іх туды разам з дрэсіроўшчыкам Андрэем Дземенцьевым-Карнілавым.
Віно online
Мінфін Расіі прапанаваў правесці эксперымент па рознічным гандлі расійскім віном праз Інтэрнэт. Законапраект ужо апублікаваны.
Пробны online-продаж з дастаўкай можа быць уведзены з 1 студзеня 2022 года ў Маскве, Маскоўскай вобласці і Мардовіі.
У рамках эксперыменту дазволяць прадаваць віно, у тым ліку мацаванае і пеністае, якое зроблена выключна з вінаграду, выгадаванага ў Расіі.
Фестываль месцаў, куды звычайна нельга
На выхадных у Празе адбудзецца фестываль Open House. Падчас яго можна будзе наведаць 80 будынкаў і прастор, якія ў звычайны час недаступныя для публікі. Дэвіз фестывалю — "Архітэктура для ўсіх". Уваход — бясплатны.
Адно з самых цікавых месцаў — Мастацкі сад (Umělecká zahrada) у Нусле. Тут былі створаны самыя вядомыя пражскія скульптуры.
Сад схаваны ў незвычайным месцы — пад Нусельскім мостам ля чыгуначных шляхоў.
