Высокая ступень небяспекі. Новы штам каранавіруса дабраўся да Еўропы
У лабараторыі / Еўрарадыё
У Еўропе заявілі аб высокай ступені рызыкі з-за новага штаму каранавіруса. Аб першых выпадках стала вядома ў Германіі і Чэхіі. Кіраўнік Еўрапейскай камісіі Уршуля фон дэр Ляен прапанавала прыпыніць авіязносіны з паўднёваафрыканскімі краінамі з-за новага варыянту каранавіруса, "пакуль не будзе дакладнага разумення, якую небяспеку ён нясе".
Авіякампанія Qatar Airways ужо прыпыніла допуск на рэйсы пасажыраў з ПАР, Зімбабвэ і Мазамбіка.
Старшыня Сусветнай медыцынскай асацыяцыі (WMA) Франк Ульрых Мантгомеры лічыць, што новы штам каранавіруса «омікрон» можа стаць такім жа небяспечным, як вірус Эбола. Аб гэтым ён сказаў у інтэрв'ю медыягрупе Funke.
Першыя выпадкі былі выяўлены ў жыхароў Чэхіі і Нямеччыны. Як мяркуецца, нямецкі грамадзянін інфіцыраваўся новым штамам падчас паездкі ў ПАР, а жыхарка Чэхіі ў Егіпце. Таксама ўчора паведамлялася аб першай ідэнтыфікацыі віруса ў Бельгіі.
