Гран-пры "Лістапада" атрымаў эстонскі мастацкі фільм "Лістапад"
У кінатэатры "Масква" 10 лістапада адбылася ўрачыстая цырымонія закрыцця XXIV Мінскага міжнароднага кінафестывалю "Лістапад", паведамляюць "Мінск-Навіны".
Гран-пры "Золата "Лістапада" заваяваў мастацкі фільм "Лістапад" эстонскага рэжысёра Райнера Сарнета.
Прызам "За лепшую рэжысуру" адзначаны Шарунас Бартас за фільм "Шэрань".
Спецыяльны прыз журы заваявала стужка "Арытмія" Барыса Хлебнікава. Гэты ж фільм атрымаў таксама спецыяльны прыз Выканаўчага камітэта СНД "Кіно без межаў" і спецыяльны прыз Мінгарвыканкама.
Прыз кіраўніка Беларусі "За гуманізм і духоўнасць у кіно" дастаўся рэжысёру-пастаноўшчыку фільма "Кентаўр" Актану Арыму Кубату з Кыргызскай Рэспублікі.
Спецыяльным прызам Парламенцкага сходу Саюза Беларусі і Расіі "За вернасць маральным ідэалам у кінамастацтве» была адзначаная дакументальная стужка "Край жанчыны" Аляксея Палуяна.
Прыз глядацкіх сімпатый за лепшы гульнявы фільм быў уручаны за карціну "Кандэларыя" Джоні Хендрыкса Інестраса.
Сярод дакументальных фільмаў прыз глядацкіх сімпатый атрымаў Арунас Матэліс за стужку "Дзіўныя няўдачнікі: іншы свет".
Прыз Гільдыі кіназнаўцаў і кінакрытыкаў Беларускага саюза кінематаграфістаў уручылі беларусцы Юліі Шатун за фільм "Заўтра", зняты на звычайны фотаапарат. Гэтая ж стужка атрымала ўзнагароду за лепшы гульнявы фільм.
Прыз "За лепшы анімацыйны фільм" атрымала Юлія Рудзіцкая за мультфільм "І месяц спыніўся".
Лепшым дакументальным фільмам была названая карціна Барыса Нікалайчыка "Вакол Беларусі на роварах з маторамі".
У асноўным конкурсе дакументальнага кіно спецыяльны прыз журы ўручылі Раці Анелі за "Горад сонца". Ён жа быў адзначаны прызам "Камера ФІПРЭССІ" за лепшы дэбют у намінацыі "Фільм як з'ява мастацтва".
