Кандыдатамі ў прэзідэнты Украіны вылучылі Цягнібока, Добкіна і Цімашэнка
29 сакавіка з’явіліся новыя афіцыйныя прэтэндэнты на пасаду ўкраінскага прэзідэнта.
З’езд усеўкраінскага аб’яднання “Свабода” вылучыў сваім кандыдатам Алега Цягнібока. Партыя “Бацькіўшчына” таксама правяла свой з’езд і пастанавіла, што яе кандыдатам стане Юлія Цімашэнка.
Партыя рэгіёнаў, якая раней падтрымлівала зрынутага прэзідэнта Віктара Януковіча, таксама вызначылася са сваім кандыдатам — ім стане былы кіраўнік Харкаўскай абласнйо адміністрацыі Міхаіл Добкін. Сябра партыі Сяргей Цігіпка, якому аднапартыйцы рэкамендавалі адмовіцца ад удзелу ў выбарах, заяўляе, што ўсё паўдзельнічае ў прэзідэнцкай гонцы.
Партыя “УДАР” сёння заявіла пра сваю падтрымку Пятра Парашэнкі як адзінага кандыдата ад дэмакратычных сіл. Лідар “УДАРУ” Віталь Клічко не будзе ўдзельнічаць у прэзідэнцкіх выбарах, а пазмагаецца за пасаду мэра Кіева, перадаюць украінскія СМІ.
