Латвія прыпыняе дзеянне пагаднення з РФ аб спрашчэнні паездак жыхароў памежжа

Латвія прыпыняе пагадненні з Расіяй аб спрашчэнні ўзаемных паездак жыхароў прыгранічных раёнаў. Такое рашэнне латвійскага кабінета міністраў пачне дзейнічаць з 1 жніўня.

У адказ на ўварванне Расіі ва Украіну Латвія перастала выдаваць візы грамадзянам РФ, у тым ліку прыгранічных, ва ўсіх латвійскіх дыпламатычных і консульскіх прадстаўніцтвах за мяжой. Праз рашэнне Расіі закрыць латвійскае консульства ў Пскове выдача прыгранічных дазволаў больш немагчымая, паколькі гэта было адзінае дыпламатычнае і консульскае прадстаўніцтва Латвіі за мяжой, якое выдавала такія дазволы грамадзянам РФ.

Пагадненне аб спрашчэнні ўзаемных паездак жыхароў прыгранічных раёнаў дзейнічала з 2010 года.