Мінчукі просяць пакінуць "Чалавека без твару"
Мінчукі просяць пакінуць мурал "Чалавек без твару", які набыў шырокую вядомасць. Шмат падобных зваротаў да чыноўнікаў паступіла пасля звестак пра тое, што гэты твор могуць зафарбаваць.
Пра гэта "Мінск-навінам" распавёў намеснік кіраўніка адміністрацыі Кастрычніцкага раёна сталіцы Ігар Жур. "Пасля таго як у СМІ напісалі, што малюнак могуць зафарбаваць, да нас паступіла вялікая колькасць зваротаў з просьбай захаваць яго. Прычым ад людзей рознага ўзросту. Літаральна на мінулым тыдні на партал "Мой Горад" 115.бел мінчук напісаў пра тое, што карціна падабаецца і яму, і яго 55-гадовай маці, і яе ні ў якім разе нельга знішчаць", — кажа чыноўнік.
"Чалавека без твару" зафарбуюць, калі аўтар не ўгаворыць мінчан
Жур дадаў, што карціна была створаная мастаком, і толькі ён можа ўнесці змены. Да таго ж, не варта забываць, што гэтая праца яшчэ не скончаная, графітыст з Грэцыі iNO з'ехаў, бо ў яго скончыўся тэрмін візы.
"Думаю, што больш разумна абмяркоўваць гэтае пытанне ў красавіку-траўні, калі ён зноў да нас прыедзе. Яму ў Мінску вельмі спадабалася, і ён выказаў жаданне яшчэ папрацаваць", — дадаў прадстаўнік раённай адміністрацыі.
