Мурал з партрэтам Караткевіча не аднавілі пасля рамонту дома ў Оршы
Дом, дзе быў мурал з партрэтам Караткевіча / "Віцебская Вясна"
У Оршы не аднавілі мурал з партрэтам славутага земляка, пісьменніка Уладзіміра Караткевіча.
Рамонт дома №2 па вуліцы Марата скончаны, але няма ніякіх прыкметаў аднаўлення славутага мурала, адзначае "Віцебская Вясна". Дзяржаўная прэса і мясцовыя ўлады нават ніяк не каментуюць тое, што Орша страціла гарадскую адметнасць і мемарыяльны аб’ект, прысвечаны знакамітаму земляку.
Мурал, створаны аршанскім мастаком Дзмітрыем Талкачовым, з'явіўся ў лістападзе 2020-га — да 90-х угодкаў з дня нараджэння Караткевіча. Тарцавая сцяна дома, на якой ён быў зроблены, выходзіць на вуліцу імя Караткевіча. На мінакоў "глядзеў" партрэт пісьменніка ў атачэнні фрагментаў яго рукапісаў і малюнкаў.
Сёлета ў доме пачалі рамонт, і партрэт пісьменніка знік пад "тэрмашубай".
Дарэчы, недалёка ад гэтага дома знаходзіцца і аршанская хата Уладзіміра Караткевіча.
