На літаратурную прэмію Цэнтральнай Еўропы Angelus прэтэндуюць два беларускія аўтары

Стаў вядомы лонг-ліст літаратурнай прэміі Цэнтральнай Еўропы Angelus — 2026.

У спісе з 14 прэтэндэнтаў ёсць два беларускія аўтары. Уладзімір Арлоў прадстаўляе кнігу "Танцы над горадам" (пераклад Багдана Задуры), а Ева Вежнавец (сапраўднае імя Святлана Курс) — "Па што ідзеш, воўча?" (пераклад Малгажаты Бухалік). Абодва творы сваім часам былі ўганараваныя беларускай прэміяй імя Ежы Гедройця.

У спісе прэтэндэнтаў ёсць таксама вядомы ўкраінскі літаратар Сяргій Жадан і нобелеўскі лаўрэат з Венгрыі Ласла Краснагоркаі.

Дарэчы, старшынёй журы на прэміі Angelus сёлета стаў яшчэ адзін беларускі паэт і перакладчык — Андрэй Хадановіч.

На прэмію Angelus могуць прэтэндаваць кнігі, напісаныя па-польску ці перакладзеныя на польскую мову.