Мінтранс хоча павысіць кошт квіткоў у гарадскім транспарце на 100 рублёў

Міністэрства транспарту і камунікацый унесла ва ўрад прапанову павысіць тарыфы на праезд у гарадскім транспарце. Пра гэта заявіў міністр Іван Шчэрба, паведамляе БелаПАН. Ён растлумачыў, што тарыфы не змяняліся з жніўня 2007 года. Між тым выдаткі транспартнікаў за гэты час павялічыліся — выраслі кошты на паліва, запасныя часткі і агрэгаты. Таму Мінтранс прапаноўвае павысіць тарыфы на гарадскія перавозкі пасажыраў — на 100 рублёў: да 600 рублёў — у абласцях, да 700 рублёў — у Мінску.

Шчэрба ўпэўнены, што павышэнне кошту праезду ўсяго на 100 рублёў з'яўляецца нязначным, таму не павінна адбіцца на дабрабыце людзей.