“Міс Дажынкі-2013”: Карову даіць не ўмею, але бульбу капаю!

19-гадовая студэнтка з Віцебска і будучая таваравед Святлана Гарбачова стала пераможцай першага ў гісторыі Беларусі конкурсу “Міс Дажынкі-2013”.

Еўрарадыё: Святлана, а як вы патрапілі на конкурс?

Святлана Гарбачова: На базе нашага ўніверсітэта ў нас ёсць студэнцкі дом моды. Як я разумею, нас адбіралі на “Дажынкі”, каб дзяўчаты былі беларускай знешнасці – светлыя валасы, блакітныя вочы…

Еўрарадыё: Распавядзіце, калі ласка, пра конкурсы прыгажосці, у якіх вы ўдзельнічалі яшчэ?

Святлана Гарбачова: Я ўдзельнічала толькі ва ўніверсітэцкім конкурсе прыгажосці. І я там не перамагла, як пішуць на сайтах! Я была толькі “Міс глядацкіх сімпатый”. А на гэты конкурс я ішла, каб добра прадставіць сваю вобласць, не тое, каб я хвалявалася на конкурсе — ўдзельнічала дзеля задавальнення: прайсціся, паўсміхацца, усе на цябе глядзяць!

Еўрарадыё: Конкурс “Міс Дажынкі” праходзіў першы раз, а распавядзіце, што гэта за конкурс?

Святлана Гарбачова: Планавалася, калі гэты конкурс добра пройдзе – будзе праводзіцца яшчэ. Што ён сімвалізуе… Ну, пэўна прыгажосць беларускую. Як гэта выказацца – што ў нас дзяўчаты такія…  валасы пшанічнага колеру, светлыя вочы. Гэты конкурс сімвалізуе Беларусь.

Еўрарадыё: А вы ў палях працавалі?

Святлана Гарбачова: Натуральна, мы кожны год ад універсітэта ездзім прыбіраць бульбу. У гэтым годзе мы ездзілі ў Рудакова. Мы на вагу збіралі, і потым лепшую групу прэміруюць. Але ў нас вельмі маленькая група – і мы збіралі з іншай групай.

Еўрарадыё: Карову даіць умееце?

Святлана Гарбачова: Ой, не. Карову, на жаль, даіць не ўмею, але бульбу капаць умею. І палоць градкі.

Еўрарадыё: Мо назавіце, якая ўраджайнасць у нас ў гэтым годзе?

Святлана Гарбачова: Ну… я дакладнай інфармацыяй не валодаю… Але ўвогуле па ўраджайнасці ў нас перамагла Віцебская вобласць – таму наступныя дажынкі будуць праходзіць у Віцебскай вобласці.

Еўрарадыё: Святлана, вы чулі пра прапанову прэзідэнта ўвесці 100 долараў пошліны за выезд за мяжу…

Святлана Гарбачова: Шкада, я яшчэ не чула, я як прыехала з конкурсу я адсыпалася доўга… Але абавязкова прачытаю.

Еўрарадыё: …дык вось адна быццам бы з мэтаў ўвядзення гэтай пошліны – абарона беларускіх вытворцаў. А вы носіце беларускую вопратку?

Святлана Гарбачова: Абутак нашу беларускі, бо ён добры па якасці. Вопратка – мне падабаецца “Світанак”, напрыклад, – там добрыя маечкі. На конкурсе спадабалася льняная калекцыя.

Еўрарадыё: А як у “Міс Дажынкі” з вучобай?

Святлана Гарбачова: Ва ўніверсітэце я вучуся на трэцім курсе, без хвастоў. Сесію бывае здаю і са шпаргалкамі.

Еўрарадыё: Вы на бюджэце вучыцеся?

Святлана Гарбачова: Не, я вучуся на платным. За адзін семестр мы заплацілі 5 мільёнаў, дарагое навучанне ў нас ў краіне – 10 мільёнаў за два семестры…

Еўрарадыё: Прарэктар вашага Віцебскага ўніверсітэта Барыс Рыклін адзначыў, што вы ўжо два гады сустракаеце прэзідэнта падчас яго візітаў на “Славянскі базар”? А як вы туды патрапілі?

Святлана Гарбачова: Быў быццам бы кастынг у аблвыканкаме. Мне патэлефанавалі: “Света, ідзі хутчэй, мо будзеш прэзідэнта сустракаць!”. І ў выніку мне патэлефанавалі. Мы разам з яшчэ адной дзяўчынкай сустракаем кіраўніка дзяржавы ўжо два гады. Мы ўручаем кветкі і кажам словы прывітання. Але страшна вельмі. Бо такі сур’ёзны момант.

Еўрарадыё: Вы па спецыяльнасці таваравед-эксперт, вы будзеце працаваць у краме ці пойдзеце ў мадэльны бізнес?

Святлана Гарбачова: Я думаю, што ў сучасным жыцці трэба атрымаць спецыяльнасць, адукацыю. Пакуль, планую працаваць па спецыяльнасці.

Еўрарадыё: Ці чулі вы пра конкурс “Міс Мінск” і пра скандал з ёй?

Святлана Гарбачова: Чула, і ў нас былі ўмовы, каб не было фотак ню – ну пасля гэтага скандалу, мы не павінны былі быць замужам, узрост быў агавораны і рост. Я не лічу, што конкурс “Міс Дажынкі” ганебны, як многія пішуць. Я так не лічу, і майму хлопцу не сорамна, што я ўдзельнічала. І мне таксама. Ён вельмі мяне падтрымліваў і перажываў. Але калі людзі абмяркоўвалі – значыць, ім гэта цікава.