На чэмпіянаце свету па хакеі вызначыліся першыя паўфіналісты

Першымі паўфіналістамі чэмпіянату свету па хакеі сталі зборныя Фінляндыі ды Злучаных Штатаў. Нагадаем, што спаборніцтвы праходзяць у Расіі — адначасова ў Маскве і Санкт-Пецярбургу.

Фіны на лёдзе санкт-пецярбургскага спарткомплексу "Юбілейны" сустракаліся з камандай Даніі. Каманда Фінляндыі атрымала ўпэўненую перамогу з лікам 5:1. Прычым Мікаэль Гранлунд забіў дзве шайбы — першую на 15-й хвіліне, а другую на 60-й.

У маскоўскім Лядовым палацы за выхад у паўфінал змагаліся каманды Чэхіі ды ЗША. І хаця чэхі адкрылі лік яшчэ ў першым перыядзе, амерыканцам удалося зраўняць яго ў другім. І да канца гульні ніводная з камандаў так і не вызначылася забітымі шайбамі — 1:1. Не дапамог вызначыць мацнейшага і авертайм. Толькі па булітах амерыканцы здолелі перамагчы чэшскую каманду — 2:1.

Сёння адбудуцца яшчэ дзве чвэрцьвінальныя сустрэчы. У Маскве сустракаюцца зборныя Расіі ды Нямеччыны, а ў Санкт-Пецярбургу — каманды Канады і Швецыі.

Паўфінальныя гульні сусветнага першынства пройдуць у Маскве 21 траўня. Зборная ЗША будзе сустракацца з пераможцам пары Канада — Швецыя, каманда Фінляндыі — з трыўмфатарам матчу Расія — Нямеччына.