Не разумеюць ці думаюць, што ўсё пад кантролем: беларус пра сітуацыю ў Маскве

Пра агульную сітуацыю я даведаўся, напэўна, як і ўсе астатнія, з тэлеграм-каналаў. Калі Прыгожын пачаў посціць аўдыёзапісы [дзе абвясціў, што "ідзе разбірацца, чаму ў краіне дзеецца беззаконне". — Еўрарадыё], я падумаў, што, можа быць, гэта чарговая правакацыя. Праз пару гадзін стала зразумела, што раніцай хутчэй за ўсё весці будуць "вясёлыя".

У расіян сярод сяброў і знаёмых Аляксея, з якімі ён паспеў пагаварыць аб тым, што здарылася, рэакцыі і меркаванні розныя.

— Хтосьці ў шоку, хтосьці кажа: "Я наогул нічога не разумею". Камусьці я тэлефанаваў, а яны толькі прачнуліся і наогул навіны не чыталі. Ёсць, натуральна, людзі, якія вераць у канспіралагічныя тэорыі, што нібыта ўсё гэта робіцца для таго, каб зняць Шайгу з пасады міністра абароны.

Не разумеюць ці думаюць, што ўсё пад кантролем

Вы ж разумееце, Масква — гэта як асобная дзяржава ў Расіі. Часцяком праблемы іншых рэгіёнаў тут наогул ніяк не адчуваюцца. Думаю, што вялікая колькасць людзей не разумеюць да канца, што адбываецца. Іншыя разумеюць, але чамусьці лічаць, што ўсё пад кантролем. Гэта значыць пакуль тут чагосьці канкрэтнага адбывацца не будзе, народ будзе ў прынцыпе нейтральны.

Часцяком інфармацыю так падаюць, быццам цяпер будзе жудасць, усяму канец. Але я заходжу ў краму і не бачу, каб людзі як у кавід безупынна закупляліся туалетнай паперай або грэчкай. Чэргаў няма нідзе.

Сам Аляксей не панікуе, але кажа, што заплечнік на экстраны выпадак у яго стаіць з сакавіка 2022 года.

— Сітуацыя разгортваецца досыць актыўна і незразумела, што будзе ў наступныя пару гадзін. Пакуль усё ідзе сваёй чаргой.

Вядома, калі нешта будзе адбывацца не зусім бяспечнае, то мною будзе прымацца рашэнне, што трэба з'язджаць. Але я не лічу, што як толькі з'явілася нейкая навіна, трэба адразу ж бегчы ў паніцы і прадпрымаць часцяком неабдуманыя і няправільныя рашэнні, — заключае Аляксей.