Вайсковая тэхніка ў Маскве і дзве арміі РФ: што адбываецца з бунтам Прыгожына
Скрыншот з відэазварота Прыгожына ў Растове / t.me/pozdnyakov_vagneraa
Кіраўнік ПВК “Вагнер” Яўген Прыгожын акапаўся ў Растоўскай вобласці. Ён кажа, што ўзяў пад кантроль вайсковыя аб’екты і абяцае “пайсці на Маскву”, калі не будуць выкананыя яго патрабаванні. Ён хоча як мінімум паразмаўляць з кіраўнікамі Мінабароны і Генштаба РФ Шайгу і Герасімавым, якіх лічыць адказнымі за абстрэл пазіцый ПВК “Вагнэр”. Агулам ён дамагаецца іх адхілення з пасад.
Раніцай Прыгожын ужо замацаваўся ў Растове. Мінабароны Расіі выпусціла заяву да “вагнэраўцаў” з заклікам не весціся на “авантуры” Прыгожына. І абяцала, калі да іх звернуцца, дапамагчы вернуцца “ў пункты дыслакацыі”, то бок на фронт.
У Маскве, Падмаскоўі і Варонежскай вобласці ўведзены “рэжым контртэрарэстычнай аперацыі”. Але, чамусьці не ў Растоўскай, дзе знаходзіцца Прыгожын.
Прыгожын сцвярджае, што сілы расійская арміі спрабавалі атакаваць яго калоны, якія рухаліся ў Варонежскай вобласці, але верталёты былі збітыя.
Пуцін звярнуўся да расіян. І, гледзячы па яго прамове, ставіцца да сітуацыі вакол мяцежу Прыгожына максімальна сур’ёзна. Ён назваў тое, што адбываецца здрадніцтвам і адступніцтвам, паабяцаў не дапусціць “паўтарыцца расколу ў Расіі” і “абараніць расіян”. Але не ўдакладніў, ад каго. У сацсетках жартуюць, што цяпер армія Расіі ўвогуле не другая ў свеце, а проста “другая армія ў Расіі”.
Таксама Пуцін паабяцаў прымаць самыя жорсткія меры і даручыў “стабілізаваць сітуацыю” ў Растоўскай вобласці.
