Сенатары пераедуць у чытальную залу — праз дарогу ад прэзідэнта

120910 Savi4 SR.mp3

Будаўніцтва “алмаза ведаў” заняло тры з паловай гады, і амаль шэсць гадоў будынак старой бібліятэкі не выкарыстоўваецца!

Як даведалася Еўрарадыё, рэканструкцыя гэтага дома на вуліцы Чырвонаармейскай ідзе ўжо... два з паловай гады.

У калідорах будаўнічы пыл, мэбля ў цэлафане. На дзвярах — указанні, што і дзе дарабіць: няма току ў разетках, дзе брудныя шпалеры і дэфекты мэблі.

Пытаюся ў рабочых, што будзе ў будынку. Большасці ўсё роўна, хто тут адзначыць наваселле:

"Я тут трэці раз, не ведаю, што тут будзе", — паціскае плячыма будаўнік.

Другі ўпэўнена адказвае: тут размесціцца Савет Рэспублікі. Будаўнікі кажуць, што трэба паспець да выбараў і нават папярэджваюць, што будынак рэжымны — нельга фатаграфаваць.

Заказчык рэканструкцыі — "Галоўнае ўпраўленне капітальнага будаўніцтва" Упраўлення справамі прэзідэнта. Тут пацвярджаюць, што будынак прызначаны для Савета Рэспублікі:

"Гэта не сакрэт, хто хоць неяк палітыкай цікавіцца. Там такія залы будуць для народных дэпутатаў!" — кажа галоўны інжынер УКБ Упраўлення справамі прэзідэнта Ігар Гусеў.

Там, дзе была галоўная чытальня, размесціцца зал для паседжанняў.

У Савеце Рэспублікі ўжо год сядзяць на валізках, чакаюць, што пераедуць у кастрычніку:

“Чаму пераязджаем? А сюды сорамна вадзіць дэлегацыі. Новы прэс-цэнтр патрэбны, залы паседжанняў”.

На пытанне Еўрарадыё, ці не шмат месца для сенатараў, якіх толькі 64 чалавекі, атрымоўваем нечаканы адказ:

“Нам жа толькі адно крыло будзе! Усе роўна будзем сядзець па два-тры чалавекі ў кабінеце”.

Чыноўнікі — яны такія.