Магілёвец Паўлоўскі просіць Марыну Цыбліенку дапамагчы судзіцца (дакумент)
Таксама Аляксей Паўлоўскі выслаў жанчыне 30 рублёў.
Ён хоча, каб жанчына на гэтыя грошы паправіла сваё здароўе пасля судовага працэсу з апазіцыйным палітыкам Віктарам Івашкевічам.
Актывіст кажа, што пачуцці Цыбліенкі для яго вельмі блізкія, асабліва пасля таго як у краіне знізіўся жыццёвы ўзровень грамадзян. Паўлоўскі лічыць, што вінаватая падрыўная дзейнасць “пятай калоны”, якая акапалася ў кіраўніцтве Беларусі.
Таму магілёвец просіць, каб Цыбліенка дала яму параду, як спагнаць маральныя страты з асобаў, вінаватых у дэвальвацыі, інфляцыі і штодзённым росце коштаў.
Нагадаем, што аператарка ЭВМ Мазырскага нафтаперапрацоўчага завода Марына Цыбліенка праз суд спагнала з Віктара Івашкевіча 500 тысяч рублёў маральнай страты. Прычынай сталі заклікі апазіцыянера да ўвядзення эканамічных санкцый супраць беларускіх НПЗ. Жанчына казала ў судзе, што праз гэта ў яе парушыўся сон і пачаў скакаць ціск.
