Жыхары гомельскага шматпавярховіка, дзе адбыўся выбух, могуць вярнуцца ў свае кватэры
Жыхары дома на вуліцы Косарава могуць вярнуцца ў свае кватэры / t.me/Gomel_official/
Жыхары гомельскага шматпавярховіка на вуліцы Косарава, дзе паўгода таму адбыўся выбух, могуць вярнуцца ў свае кватэры.
2 ліпеня чыноўнікі ўручылі ім ключы ад жылля. Паведамляецца, што ў пад'ездзе аднавілі падачу вады, газу і электрычнасці. Там правялі прыборку і тэхнічную праверку сістэм, гаворыцца ў тг-канале гарвыканкама.
Страшны выбух у доме №3 па вуліцы Косарава адбыўся 17 снежня 2025 года. Ад яго абваліліся пліты перакрыццяў жылых пакояў з восьмага па шосты паверх, была пашкоджаная вонкавая сцяна. Пад заваламі знайшлі загінулую жанчыну, якая жыла ў гэтым доме. Прычынай надзвычайнага здарэння назвалі ўспышку газапаветранай сумесі.
Цягам некалькіх месяцаў адбываўся рамонт пашкоджанага пад'езда. Пры гэтым жыхароў іншых пад'ездаў не высялялі.
