МЗС Беларусі загаварыў пра дыялог з Еўрасаюзам
Гэта адбылося пасля таго, як прадстаўнікі ЕС прывіталі вызваленне палітвязняў Андрэя Саннікава і Змітра Бандарэнкі.
Прэс-сакратар МЗС Андрэй Савіных заявіў агенцтву БЕЛТА, што толькі на аснове дыялогу можна эфектыўна спыніць эскалацыю ў адносінах паміж нашай краінай і ЕС. Гэтак дыпламат пракаментаваў заявы высокага прадстаўніка ЕС па замежнай палітыцы Кэтрын Эштан і іншых міністраў замежных справаў Еўрасаюза.
Гаворачы пра вызваленне палітвязняў, Савіных адзначыў, што ўсе працэсы ў Беларусі ажыццяўляюцца ў строгай адпаведнасці з беларускім заканадаўствам, а не пад замежным ціскам. Па яго словах, замежны ціск можа толькі затармазіць развіццё сітуацыі.
Разам з тым, Савіных выказаў надзею, што Еўрасаюз неўзабаве сядзе за стол перамоваў з афіцыйным Мінскам.
Фота — feng-shui-bazi.at.ua
