Настаўнік з Лунінеччыны будзе аздараўляць турыстаў пчоламі (фота)

Пчолы ў вуллях часта збіваюцца ў гурты і актыўна “разаграваюцца”,  працуючы крыламі. Пры гэтым выдзяляецца так шмат энергіі, што нават разаграваецца сценка вулля.  Пра гаючы эфект гэтай зоны разагрэву Анатоль Нефідовіч даведаўся ад знаёмага пчаляра. 

Анатоль Нефідовіч: “Перасіліўся чалавек, былі праблемы ў спіне. Дык ён адмыслова падышоў да вулля, прытуліўся спінай, пасядзеў так  хвілін дваццаць, — і адпусціла.  Я даведаўся, вырашыў, што гэта цікава. Зрабіў гэты ляжак, каб лежачы сеанс можна было прымаць”.

На біяэнергетычным лежаку можна нават заночыць.

Прэзентацыя “пчалінай хаткі”  выявілася неспадзяванкай прэс-тура “Палескія балоты — лёгкія Еўропы — у небяспецы”, які ладзіла Лунінецкая філія Беларускай асацыяцыі журналістаў.  Удзельнікі тура спыніліся  ў аграэкасядзібе Нефідовічаў “Прыпяцкі плёс” у вёсцы Лахаўка пасля байдарачнага перахода па Ясельдзе. Некалькі чалавек змаглі ў скарочаным рэжыме аднавіцца пчалінай энергіяй. 

І Анатоль Нефідовіч, і ягоная жонка Ірына — настаўнікі мясцовай школы.  Сваю працу спалучаюць з турыстычным менеджментам.