Сёння пройдзе акцыя "Парыж за Алеся Бяляцкага"
11 траўня а 11-й гадзіне на фасадзе будынка мэрыі французскай сталіцы вывесяць гіганцкі партрэт беларускага палітвязня з заклікам да яго вызвалення.
Урачыстае мерапрыемства, пра якое паведамляюць гарадская прэса і сайт мэрыі Парыжу, адбудзецца ў рамках акцыі "Парыж за Алеся Бяляцкага". Як паведамляе сайт spring96.org, на мітынгу, падчас якога будзе вывешаны партрэт, выступяць прадстаўнік мэра па міжнародных пытаннях П'ер Шапіра, а таксама кіраўнікі праваабарончых міжнародных арганізацый.
Варта адзначыць, што звычайна мэрыя Парыжу вывешвае партрэты французскіх грамадзянаў, якія апынуліся закладнікамі ў іншых краінах.
Нагадаем, праваабаронца Алесь Бяляцкі быў асуджаны ў лістападзе 2011 года на 4,5 года зняволення за няплату падаткаў. Пакаранне ён адбывае ў бабруйскай калоніі. Краіны ЕС, ЗША, праваабаронцы лічаць яго палітвязнем і патрабуюць неадкладнага вызвалення.
Фота — bymedia.net
