Суддзя: Удзел у форуме Ўсходняга Партнёрства — непаважлівая прычына

Суд па позве Таццяны Шапуцькі да Міністэрства адукацыі цягнуўся ад ўчорашняга ранку да паловы на сёмую вечара, рашэнне суда было зачытанае сёння. Таццяна Шапуцька падала ў суд на БДУ, бо лічыць сваё адлічэнне з юрфака БДУ незаконным і палітычна матываваным. Студэнтка была адлічаная пасля ўдзелу ў Форуме грамадзянскай супольнасці Ўсходняга Партнёрства і пропуску з гэтай прычыны трох дзён заняткаў.

Суд праходзіў у даволі напружанай атмасферы. У зале, апроч зацікаўленых бакоў, увесь час сядзелі два міліцыянты ў форме і, выглядае, адзін супрацоўнік спецслужбаў у цывільным  — прынамсі, прыйшлі яны разам і ўвесь час перагаворваліся.

Абараняла Таццяну Шапуцьку адвакатка Мар’яна Сямашка, у якасці грамадскага абаронцы выступаў знаны юрыст Гары Паганяйла. Таццяна сцісла пераказала нам сутнасць іх аргументаў.

Таццяна Шапуцька: Асноўнымі довадамі нашага боку былі наступныя. Сярод прадстаўленых папераў не было прадстаўлення дэкана аб адлічэнні, а была толькі службовая запіска, дзе ён прасіў вымову. Па-другое, у загадзе аб адлічэнні не былі дадзеныя канкрэтныя спасылкі на парушаныя мною правілы ўнутранага распарадку, а была вельмі абагульненая фармулёўка. Трэцяе  — падчас вынясення дысцыплінарнага пакарання не была ўлічаная мая паспяховасць, мае паводзіны і добрыя стасункі з аднагрупнікамі.

Рэч у тым, што Гары Паганяйла вынайшаў даволі цікавую фармулёўку ў Статуце БДУ. Там прапісана, што “прадстаўленне на адлічэнне студэнта выносіць дэкан, а афармляе рэктар”. Спадар Паганяйла доўга дапытваўся ў прадстаўнікоў Мінадукацыі і БДУ, ці бачаць яны розніцу між тым, хто прапануе адлічыць, а хто гэта афармляе. Суд пакінуў гэта па-за ўвагай.

У якасці сведкі быў апытаны намеснік дэкана юрфака БДУ спадар Шыдлоўскі. Ён пацвердзіў суду, што Таццяна Шапуцька была вельмі добрай студэнткай, мела сярэдні бал 8,22, цудоўна здавала ўсе сесіі, у групе паводзілася вельмі прыязна, канфліктаў не мела. Спадар Шыдлоўскі таксама пацвердзіў, што дэканат у службовай запісцы да рэктара сапраўды прасіў для Шапуцькі толькі вымову. Але ён, Шыдлоўскі, не бачыць парушэння ў тым, што рэктар прыняў рашэнне аб адлічэнні.

Студэнтам спадар Шыдлоўскі вядомы яшчэ і тым, што калі ў абарону Таццяны было сабрана больш за 300 подпісаў, ён выклікаў актыўных збіральнікаў у кабінет і “праводзіў гутаркі”, пасля чаго дзяўчаты выходзілі ад яго ў слёзах, а многія адклікалі подпісы назад. Гэтыя факты, агучаныя на судзе Таццянай Шапуцькай, спадар Шыдлоўскі не прызнаў.

Цікава, што ў рашэнні суда намеснік старшыні суда Маскоўскага раёна Мінска Юрый Шастакоў падкрэсліў, што ўдзел у Форуме грамадзянскай супольнасці Ўсходняга Партнёрства суд не лічыць паважнай прычынай для пропуску заняткаў. Нягледзячы на тое, што Таццяна – адзіная студэнтка БДУ, якая атрымала персанальнае запрашэнне Еўракамісіі на мерапрыемства такога высокага ўзроўню.

Суддзя Юрый Шастакоў: Суд ацаніў усе сабраныя і даследаваныя па справе доказы, улічваючы, што заяўніца адсутнічала на занятках 20 гадзінаў у перыяд ад 16 па 18 лістапада 2009 года, пра што не паведаміла службовым асобам універсітэта і не прадставіла дакументаў, якія б тлумачылі паважнасць яе прычыны адсутнасці на занятках. А яе ўдзел у Форуме без атрымання дазволу на пропуск заняткаў упаўнаважаных службовых асобаў на думку суда не з’яўляецца паважлівай прычынай для пропуску заняткаў.

Аднак у выніку ўсё было зведзена да вельмі хітрай фармулёўкі: што Таццяну правамоцна адлічылі не за пропуск заняткаў, а за тое, што не паведаміла належным чынам адказным асобам БДУ. На судзе прагучала цікавая думка, што калі пачаць адлічаць студэнтаў за пропуск 20 гадзінаў заняткаў, у БДУ не застанецца студэнтаў увогуле.

Рашэнне суда было, зрэшты, чаканым і нікога асабліва не здзівіла. Довады Шапуцькі і яе прадстаўнікоў былі пакінутыя па-за ўвагай, суддзя цалкам прыняў бок БДУ і Міністэрства адукацыі.

Суддзя Юры Шастакоў: Суд вырашыў: Шапуцьцы Таццяне Віктараўне ў задавальненні скаргі на неправамоцныя дзеянні БДУ адмовіць.