Сустрэча адваката з Някляевым магчымая не раней за 27 снежня
Адвакат Уладзіміра Някляева Тамара Сідарэнка сёння ізноў не здолела трапіць да свайго падабароннага.
Паколькі ў суботу і нядзелю ў следчым ізалятары КДБ выхадны, адвакат не спадзяецца пабачыць свайго падабароннага раней за панядзелак, 27 снежня.
Сідарэнка мяркуе, што яе нядопуск да Някляева "ствараецца мэтанакіравана". 22, 23 і 24 снежня неабходныя для такой сустрэчы дакументы перадаваліся ў час. Аднак, "нягледзячы на то, што гэта "жывая чарга", выклікаюць следчых і адвакатаў да людзей, што стаяць пазней за нас".
Адвакат падкрэсліла, што ні ў яе, ні ў родных няма ніякіх звестак наконт стану здароўя Някляева, перадае БелаПАН.
