У Пінску ўсталявалі фальшывы трафей вайны з Напалеонам? (фота)
Гэта на старонках газеты “Пінскі веснік” сцвярджае пінскі краязнаўца Вячаслаў Ільянкоў.
У гарадскім парку культуры і адпачынку здаўна стаіць гарматны ствол. Побач з ім усталяваны вялікі камяніска з надпісам “Тут у чэрвені 1812 года рускія жаўнеры пад камандай Жавахава І.С. уступілі ў бой з аддзелам непрыяцеля і захапілі гармату — першы ў гісторыі Айчыннай вайны трафей”.
Аднак, як сцвярджае краязнаўца, падчас напалеонаўскіх войнаў выкарыстоўваліся гладкаствольныя гарматы, якія зараджаліся з дула. А ў парку знаходзіцца ствол з наразнымі каналамі і казённай часткай. Такія гарматы з’явіліся толькі ў другой палове ХІХ стагоддзя. Вынікае, што гэты трафей несапраўдны. І невядома, адкуль ён узяўся.
