У Белавежскай пушчы знайшлі рэдкі грыб, падобны на вадаспад
Герыцый грабеністы ў Белавежскай пушчы / npbp.by
У Белавежскай пушчы знайшлі надзвычай рэдкі грыб, паведамляецца на сайце Нацыянальнага парка.
Гэта герыцый грабеністы або, па-навуковаму, Hericium erinaceus Pers. Яго знаходкі на тэрыторыі Беларусі можна літаральна пералічыць на пальцах рукі. Прычым усе яны былі зробленыя менавіта ў Белавежскай пушчы.
Упершыню герыцый грабеньчаты выявіў міколаг Павел Міхалевіч у 1967 годзе. Другая знаходка трапілася супрацоўнікам лабараторыі мікалогіі Інстытута эксперыментальнай батанікі ў 2016-м — праз амаль 50 гадоў пасля першай. Сёлета гэты ўнікальны грыб выявілі адразу ў трох месцах.
Звонку гэты грыб, як бачна на фота, нагадвае вадаспад або фантан. За гэта ён атрымаў народную назву "дзедава барада".
Расце ён пераважна на мёртвай драўніне — на дубе або грабе, часам сустракаецца і на аслабленых, яшчэ жывых дрэвах.
Герыцыю грабеньчатаму прыпісваюць падтрымку "кагнітыўных функцый, памяці і добрага настрою".
