У КДБ назвалі прозвішчы затрыманых па справе "трох баявых ячэек"

У КДБ назвалі прозвішчы затрыманых у жніўні-верасні па справе "трох баявых ячэек". Іх называюць "памагатымі СБУ", якія нібыта рыхтавалі тэракты на чыгунцы ў Беларусі.

Першая група — Павел Вабішчэвіч і Андрэй Зіненка. Па версіі КДБ, яны нібыта здымалі фота і відэа розных аб'ектаў на тэрыторыі РБ, а пасля перавозілі выбухоўку са схованак у Лоеўскім і Хойніцкім раёнах у Чэрвеньскі раён, рыхтавалі тэракт на чыгунцы ў Стаўбцоўскім раёне. Затрыманыя спецназам КДБ у ноч з 26 на 27 жніўня.

Кіраўніком другой групы назвалі ўкраінца Івана Ліхалата, які з 2013-га жыве ў Беларусі, стварыў сям'ю. Ён нібыта прыцягнуў да арганізацыі дыверсіі на чыгунцы ў Талачынскім раёне Віцебскай вобласці двух жыхароў Гродна з "прафесійнымі навыкамі мінна-выбуховага справы" — Івана Бародзіча і Барыса Пухальскага. Затрыманыя 4 верасня.

У трэцяй групе толькі адзін чалавек — украінец Вячаслаў Бародзій ("Мангуст"). Сцвярджаецца, што па заданні ўкраінскіх спецслужбаў ён перапраўляў праз мяжу ў РБ зброю і выбухоўку, пакідаў іх у схованках. 1 верасня яго затрымалі ў Ельскім раёне.

Па версіі КДБ, адной з задач СБУ была "спроба стварэння бачнасці наяўнасці ў нашай краіне нейкага арганізаванага падполля".

Чарговая гісторыя пра "тэрарыстаў" можа быць інсцэніроўкай ці правакацыяй.