За другі квартал кліенты вынеслі з "Белгазпрамбанка" 1 млрд рублёў

З дакумента бачна, што за той жа перыяд у "Белгазпрамбанка" сфармаваліся абавязацельствы перад Нацбанкам Беларусі на 215 млн рублёў. Пра тое, што БГПБ вымушаны карыстацца падтрымкай Нацбанка, 22 чэрвеня распавяла кіраўніца часовай адміністрацыі БГПБ Надзея Ермакова: "Праблем з ліквіднасцю няма дзякуючы ўдзелу Нацыянальнага банка Беларусі і банкаўскай сістэмы ў цэлым".

11 чэрвеня ў "Белгазпрамбанку", які на 99% належыць расійскім акцыянерам, прайшлі ператрусы. Дэпартамент фінансавых расследаванняў Камітэта дзяржкантролю пачаў некалькі крымінальных спраў, былі затрыманыя топ-менеджэры банка. Праз тыдзень, 18 чэрвеня, быў затрыманы экс-старшыня праўлення БГПБ Віктар Бабарыка, які пакінуў гэтую пасаду дзеля ўдзелу ў прэзідэнцкіх выбарах.

14 чэрвеня банк атрымаў часовую адміністрацыю на чале з экс-старшынёй Нацбанка Надзеяй Ермаковай. У гэтую каманду, акрамя Ермаковай, увайшлі восем чалавек — супрацоўнікі "Беларусбанка" і "Белаграпрамбанка".