За салідарнасць з Украінай арыштавалі беларуса, ён абвясціў галадоўку
20 снежня суддзя Цэнтральнага раёна Мінска Вікторыя Шабуня пакарала Максіма Вінярскага адміністратыўным арыштам на 15 сутак.
Такую кару ён атрымаў за пікет салідарнасці з Майданам, які ладзіўся ля амбасады Украіны ў Мінску 30 лістапада.
Суд прызнаў актывіста вінаватым у парушэнні парадку правядзення альбо арганізацыі масавага мерапрыемства. Як паведамляе праваабарончы сайт "Вясна", актывіст папрасіў суд адтэрмінаваць выкананне пакарання на месяц з прычыны хваробы яго маці.
На знак пратэсту супраць рашэння суддзі Вікторыі Шабуні Максім Вінярскі абвесціў галадоўку.
Дарэчы, за салідарнасць з украінскім Майданам суддзя Цэнтральнага раёна Вікторыя Шабуня 12 снежня аштрафавала актывіста Іллю Дабратвора.
Фота сацыяльных сетак
