Жыхар Херсона: вельмі чакаю, калі змагу з'ездзіць у свой горад
Херсон / калаж з фота з Instagram
Дзясяткі тысяч чалавек былі вымушаныя пакінуць Херсон з моманту яго акупацыі. Сярод іх — Максім. Еўрарадыё размаўляла з ім вясной, калі ён яшчэ заставаўся ў горадзе, але пазней хлопец з'ехаў. Як ён сустрэў навіну аб вызваленні Херсона?
"Я вельмі рады, таму што нарэшце гэты горад вызвалілі, цяпер чакаю вызвалення вёскі, у якім пражываюць мае бацькі і астатняй акупаванай тэрыторыі", — кажа Максім.
Цяпер, са слоў хлопца, у яго "самае вялікае жаданне туды паехаць з моманту, як з'ехаў". "Але разумею, што пакуль УСУ не адкінуць расіян да Крыма, у Херсоне будзе даволі небяспечна жыць", — дадае ён.
"Мае сябры ўжо чакаюць афіцыйнага дазволу заязджаць у горад, і я таксама, каб хаця б з'ездзіць туды. Але жыць я пакуль там не планую, таму што, самі разумееце, там разбураная ўся інфраструктура", — сказаў суразмоўца.
