ЗША заклікалі РФ пагадзіцца на стварэнне дэмілітарызаванай зоны
ЗША заклікалі Расію пагадзіцца на стварэнне дэмілітарызаванай зоны вакол Запарожскай АЭС, у абстрэлах якой Расія і Украіна ў апошнія тыдні абвінавачваюць адна адну. Каардынатар па стратэгічных камунікацыях Савета нацбяспекі Злучаных Штатаў Джон Кірбі мяркуе, што кантраляваная сітуацыя на станцыі была б самым бяспечным варыянтам, паведамляе "Голас Амерыкі".
Кірбі падкрэслівае, што адміністрацыя Джо Байдэна падтрымлівае візіт місіі МАГАТЭ на Запарожскую АЭС.
Запарожская АЭС і горад Энергадар амаль з самага пачатку вайны знаходзяцца пад кантролем расійскіх войскаў, якія там размясцілі вайсковую тэхніку. Нядаўна ўпершыню ў гісторыі адбылося поўнае адключэнне Запарожскай АЭС ад энергасеткі Украіны.
"Патрэбны такі міжнародны ціск, які прымусіць акупантаў неадкладна выйсці з тэрыторыі Запарожскай АЭС", — лічыць прэзідэнт Украіны Уладзімір Зяленскі.
