Баевікі ДНР правялі калону ўкраінскіх палонных па Данецку (відэа)

Калону прагналі па цэнтральнай вуліцы гораду ўздоўж плошчы імя Леніна. Пра гэта паведамілі мясцовыя жыхары, якія сталі сведкамі падзеі. Суразмоўцы УНІАН паведамілі, што недзе каля 100 ваеннапалонных з заведзенымі за спіну рукамі прайшлі калонай у суправаджэнні канваіраў з аўтаматамі.

Напярэдадні на плошчу Леніна баевікі звезлі некалькі спаленых і пашкоджаных адзінак ваеннай тэхнікі — танкаў, БТРаў, гарматаў, а таксама сістэму “Град”. Паводле цверджанняў баевікоў, гэта ваенная тэхніка належыць украінскаму войску і цяпер з’яўляецца трафеем.

Як паведаміла данецкае інтэрнэт-выданне Ура — Інформ.Данбас, у часе праходжання ўкраінскіх ваеннапалонных “раз’юшаны натоўп закідвае палонных камянямі, петардамі і памідорамі”. Пасля праходжання калоны праехалі палівальныя машыны, якія змылі вадой асфальт.

У сваю чаргу, карэспандэнт “ОстроВа” паведамляе, што прыхільнікі ДНР пракліналі палонных і кідалі ў іх яйкі і пластыкавыя бутэлькі з вадой. Некаторыя з натоўпу выскоквалі, каб ударыць некага з палонных, але канвой спыняў такія спробы. Пасля “маршу” палонных пасадзілі ў аўтобусы і звезлі.