Дэканам юрфаку БДУ прызначаны чалавек, звязаны з сілавікамі

Дэканам юрыдычнага факультэта БДУ прызначаны 45-гадовы дацэнт кафедры крымінальнага права, кандыдат юрыдычных навук Андрэй Шыдлоўскі, паведамляе Задзіночанне беларускіх студэнтаў (ЗБС).

Да гэтага Шыдлоўскі працаваў першым намеснікам дырэктара ў Інстытуце перападрыхтоўкі і павышэння кваліфікацыі суддзяў, работнікаў пракуратуры і ўстаноў юстыцыі.

Новы дэкан мае ўзнагароды ад сілавікоў — Следчага камітэта і Генпракуратуры, а таксама падзяку ад Аляксандра Лукашэнкі.

Шыдлоўскі з'яўляецца членам "Белай Русі" і таварыства "Веды", якое ўзначальвае прапагандыст Вадзім Гігін.

Акрамя таго, ён уваходзіць у навукова-кансультатыўныя саветы пры Генпракуратуры і Антытэрарыстычнага цэнтра дзяржаў — удзельніц СНД.

Апошняя арганізацыя займаецца барацьбой з "тэрарызмам і экстрэмізмам", а таксама каардынуе дзейнасць дзяржаў СНД у гэтай сферы. У прыватнасці, навукова-кансультатыўны савет распрацоўвае планы і рэкамендацыі па правядзенні "контрпрапаганды" і барацьбы з "экстрэмізмам" у СНД, у тым ліку ў Беларусі.

Таксама Шыдлоўскі ўзначальвае беларускую філію "Саюза крыміналістаў і крымінолагаў".

Гэтая расійская арганізацыя, па дадзеных ЗБС, супрацоўнічае ў асноўным з сілавымі ВНУ, звязанымі з МУС і ФСБ РФ і іншымі дзяржарганізацыямі.