Ксяндза з Навагрудка забіраюць у войска

У войска прызываюць ксяндза з Навагрудка. Паведамленне пра гэта з'явілася ў ФБ-суполцы "Каталікі Беларусі".

Дзмітрый Малец будзе служыць у транспартных войсках, піша katolik.life. Да заканчэння прызыўнога ўзросту яму заставалася менш за месяц: 18 чэрвеня яму споўніцца 27 гадоў.

Раней ні каталіцкіх, ні праваслаўных святароў служыць у войска не прызывалі. Але днямі мітрапаліт Веніямін заявіў, што праваслаўным святарам таксама давядзецца служыць у транспартных войсках. Верагодна, гэтыя войскі абраныя ў сувязі з тым, што там не давядзецца браць у рукі зброю, што недапушчальна для святароў.

Дзмітрый Малец нарадзіўся ў Лідзе ў 1996 годзе. Ён выпускнік Вышэйшай духоўнай семінарыі ў Гродне, высвечаны на дыякана ў 2019 годзе, на прэсвітара — у 2020-м. Служыць не толькі ў Навагрудку, але і абслугоўвае вернікаў з вёскі Любча.