МУС Расіі зацікавілася блогам нябожчыцы Навадворскай на "Эхе Москвы"
Паліцыя правярае, ці публікаваўся на сайце радыёстанцыі зварот Валерыі Навадворскай да лідара "Правага сектара" Дзмітрыя Яраша.
Запыт ад Цэнтра па супрацьдзеянні экстрэмізму апублікаваны на сайце радыёстанцыі. Паліцыя папрасіла падаць "завераныя копіі дакументаў" аб рэгістрацыі інтэрнэт-сайта www.echo-msk.ru ў якасці СМІ.
Таксама ў ведамстве папрасілі паведаміць, ці было апублікавана на сайце радыёстанцыі "зварот Навадворскай да лідара ўкраінскіх фашыстаў Яраша". Па ўказаным у звароце адрасе браўзэр выдае памылку. У спісе запісаў Навадворскай, апублікаваных на сайце радыёстанцыі, гэтага запісу няма,адзначае РБК.
Галоўны рэдактар "Эха Москвы" Аляксей Венядзіктаў зазначыў, што ў сакавіку тэкст быў апублікаваны, але тады на яго ніхто не звярнуў увагі і не патрабаваў выдаліць.
На думку рэдактара, пра зварот Навадворскай згадалі толькі цяпер, бо на станцыю ідзе мэтаскіраваная атака. Так, 31 кастрычніка Роскамнагляд вынес папярэджанне радыёстанцыі. Ведамства заявіла, што ў праграме "Сваімі вачыма" была інфармацыя з апраўданнем практыкі ваенных злачынстваў.
Фота — ТАСС
