Юрысты Адзіева абвінавацілі “МЛ Віцебск” у ціску на трэнера, ён пагражае судом журналістам

22/06/2026 - 00:11

Гісторыя са звальненнем галоўнага трэнера “букмекераў” працягваецца

Гісторыя са звальненнем галоўнага трэнера “букмекераў” працягваецца / "Динамо-Минск"

Расійская прававая кампанія "Алетэя" абвінаваціла футбольны клуб "МЛ Віцебск" у незаконным адхіленні і псіхалагічным ціску на былога галоўнага трэнера Магамеда Адзіева. Арганізацыя будзе прадстаўляць інтарэсы спецыяліста ў спрэчцы з клубам.

Кампанію ўзначальвае расійскі спартыўны юрыст Антон Смірноў. Паводле даных "Алетэі", 16 чэрвеня 2026 года "МЛ Віцебск" незаконна адхіліў Адзіева ад выканання абавязкаў галоўнага трэнера асноўнага складу, а 19 чэрвеня прызначыў на гэтую пасаду яго былога памочніка Філіпа Сакалінскага.

"Клуб наўмысна прадпрымае дзеянні, накіраваныя на схіленне Адзіева да скасавання кантракта па ўласным жаданні", — гаворыцца ў заяве кампаніі.

Паводле даных юрыстаў, клуб такім чынам імкнецца пазбегнуць выплаты трэнеру даходу і кампенсацыі за датэрміновае скасаванне кантракта. "Алетэя" паведаміла, што ўжо накіравала клубу ліст з пазіцыяй трэнера і патрабаваннем прадставіць дакументы і інфармацыю, а ў выпадку неўрэгулявання сітуацыі мае намер прадстаўляць інтарэсы Адзіева ў Футбольным трыбунале ФІФА.

20 чэрвеня кампанія таксама звярнулася да беларускіх журналістаў, якія асвятляюць матчы Вышэйшай лігі, з просьбай пракантраляваць заяўку Адзіева на гульню паміж ФК "Мінск" і "МЛ Віцебск" і яго допуск у тэхнічную зону.

Паводле даных "Алетэі", напярэдадні клуб паведаміў трэнеру, што кантракт з ім не скасаваны і ён працягвае заставацца галоўным трэнерам асноўнага складу.

"Калі гэта так, то Адзіеў павінен быць на гульні і ў поўнай меры працягваць выконваць функцыі галоўнага трэнера. Інакш пропуск гульні яму будзе залічаны як прагул з боку клуба", — гаворыцца ў заяве кампаніі.

Нагадаем, Магамед Адзіеў быў адхілены ад трэніровак асноўнай каманды "МЛ Віцебск" 16 чэрвеня, выконваючым абавязкі трэнера стаў Сяргей Балановіч. Паводле інфармацыі “Трыбуны”, у Адзіева былі праблемы з алкаголем, праз што ён прапускаў трэніроўкі каманды.

Сустрэча 12-га тура Вышэйшай лігі паміж "МЛ Віцебск" і ФК "Мінск" скончылася з лікам 2:2. Магамед Адзіеў назіраў за гульнёй з трыбун.

У каментары для bel.football ён прыгразіў журналістам судом.

“Я пагаварыў са сваім юрыстам. Гэта мае гонар, годнасць і рэпутацыя. І гэтыя навіны, якія выйшлі ў пэўных крыніцах, выклікаюць толькі здзіўленне і з’яўляюцца відавочна з нечыёй падачы. Як гаворыцца, трэба зразумець, каму гэта больш за ўсіх патрэбна ў гэтай сітуацыі. Думайце і рабіце высновы. Я ўжо шмат гадоў працую галоўным трэнерам у розных клубах і зборнай. Усе мяне выдатна ведаюць, і мне не трэба нічога нікому даказваць. Пажадана, каб журналісты, якія пішуць падобныя пасквілі, заўсёды адказвалі за распаўсюджванне інфармацыі, якая ганьбіць. Ці звяртацца ў суд у дачыненні да гэтых так званых журналістаў, я вырашу пазней”, — распавёў Адзіеў.