Прадстаўнік СААЗ у Беларусі: высілкі для стрымлівання каранавіруса недастатковыя

На 1 траўня налічваецца 14 917 пацверджаных выпадкаў COVID-19. За апошнія суткі дадаліся 890 выпадкаў. 28 красавіка было 919 новых выпадкаў, 29-га — 973, 30-га — 846.

"Развіццё эпідэміі шмат у чым залежыць ад мер у адказ, якія прымаюцца ў маштабах краіны, — кажа прадстаўнік СААЗ. — Эпідэмія ў Беларусі перайшла ў фазу мясцовай трансмісіі інфекцыі сярод насельніцтва, што патрабуе неадкладных дзеянняў па ўзмацненні мер фізічнага дыстанцыявання".

Батыр Бердыклычаў лічыць, што, каб стрымаць і замарудзіць тэмпы эпідэміі, высілкаў толькі сферы аховы здароўя на гэтым этапе будзе недастаткова. І калі не будуць уводзіцца меры фізічнага дыстанцыявання, ён не бачыць падстаў чакаць пералому ў барацьбе з каранавірусам. А калі сітуацыя не зменіцца, найхутчэй варта чакаць далейшага росту новых выпадкаў COVID-19, кажа Бердыклычаў.

Раней Сусветная арганізацыя здароўя ўжо заклікала ўлады Беларусі прыняць агульнанацыянальныя меры па ўзмацненні фізічнага дыстанцыявання. Але ў нашай краіне працягваецца футбольны чэмпіянат, ідзе падрыхтоўка да вайсковага параду, праводзіўся суботнік. Напярэдадні вярхоўны прадстаўнік Еўрасаюза па замежных справах і палітыцы бяспекі Жазэп Барэль заклікаў афіцыйны Мінск выконваць рэкамендацыі СААЗ.