Прадукты для японскага рэстарана ў Мінску захоўваліся ў брудным гаражы
Нелегальны склад экзатычных прадуктаў для страваў японскай кухні выкрылі ў Мінску супрацоўнікі Камітэта дзяржкантролю. Ікра лятучай рыбы, тыгровыя крэветкі, марынаваны імберац, марскія водарасці, авакада і шырокая лінейка японскіх соўсаў — усё гэта захоўвалася ў гаражы ў прыватным сектары ў антысанітарных умовах.
Калі супрацоўнікі КДК прыйшлі на гэты “склад” з праверкай, то ўбачылі побач з гаражом машыну, гатовую для дастаўкі прадуктаў у рэстаран вядомай у сталіцы гандлёва маркі. З гэтых прадуктаў павінны былі рабіць сушы, сашымі, ролы і іншыя экзатычныя стравы.
Фінансавая міліцыя высветліла, што на ўсе знойдзеныя прадукты не было дакументаў, якія пацвярджаюць іх набыццё і якасць. Самі ўмовы захоўвання не адпавядалі нормам, якія забяспечваюць здароўе і бяспеку спажыўцоў такой экзотыкі.
Кошт нелегальных прадуктаў склаў каля 16 тысяч дэнамінаваных рублёў. Падчас праверкі таксама высветлілася, што сайт гандлёвай маркі, праз які прымаліся замовы на выраб і дастаўку гатовых страваў па Мінску, не быў зарэгістраваны ў Беларусі законным чынам.
Цяпер вядзецца адміністратыўны працэс, паведамляе прэс-служба КДК.
