Рабочыя з полацкага "Шклавалакна" абвясцілі страйк
На полацкім заводзе "Шкловалакно" работнікі правядуць страйк за роўнае стаўленне да рабочых, незалежна ад удзелу ў прафсаюзе. Такое рашэнне было прынятае 10 кастрычніка на канферэнцыі, арганізаванай Свабодным прафсаюзам Беларускім (СПБ), паведамляе сайт vitebskspring.org.
Прафсаюзныя лідары кажуць, што гэта апошняя мера, каб спыніць здзекі з рабочых у выглядзе дыскрымінацыі і псіхалагічнага тэрору за ўдзел у Свабодным прафсаюзе. Рабочыя склалі да наймальніка патрабаванні з 17 пунктаў, якія датычаць змены нормаў калектыўнай дамовы. У дакуменце патрабуецца забяспечыць неўмяшанне наймальніка ў дзейнасць прафсаюзу, а атксама роўнае стаўленьне да рабочых, якія ўваходзяць у розныя прафсаюзы.
Правесці страйк мяркуецца з 1 лістапада да канца года. Па словах прафсаюзных актывістаў, акцыя будзе насіць веерны характар у розных брыгадах у розны час. Рашэнне пра форму, месца і час страйку будуць прымаць непасрэдна рабочыя падраздзяленняў на месцах без папярэдняга апавяшчэння начальнікаў падраздзяленняў.
Актывіст СПБ Віктар Стукаў нагадвае, што прымус да няўдзелу ў страйку пагражае начальнікам крымінальнай адказнасцю.
Намеснік старшыні СПБ Мікола Шарах тлумачыць, што прафсаюз дасылаў наймальніку лісты і звароты са студзеня 2017 года, але ўсе яны былі праігнараваныя. Таму прафсаюз у адпаведнасці з законам вымушаны звярнуцца да такой меры, як страйк.
