Расія перадала Украіне пецярых затрыманых афіцэраў
У Радзе нацыянальнай бяспекі і абароны пацвердзілі перадачу расійскім бокам афіцэраў 72-й брыгады.
Вайскоўцы вымушаныя былі адступіць на тэрыторыю Расіі з-за абстрэлу. Пра гэта на брыфінгу ў Кіеве паведаміў прэс-сакратар Інфармацыйнага цэнтру РНБА Андрэй Лысенка, перадае УНІАН.
Паводле Лысенкі, перадача адбылася ў ноч на нядзелю, на памежным пункце Мелавое Луганскай вобласці. Усе пяць афіцэраў дастаўленыя ў бяспечнае месца. Байцы некалькі дзён знаходзіліся ў СІЗА. “Украінскія афіцэры вытрымалі ціск, нічога не было даказана, таму Следчы камітэт Расійскай Федэрацыі быў вымушаны прызнаць, што злачынстваў за гэтымі афіцэрамі няма і іх павінны былі адпусціць”, — сказаў прадстаўнік РНБА Украіны.
З яго словаў, стан вызваленых афіцэраў здавальняючы. Яны накіраваныя ў месца, дзе могуць атрымаць дапамогу, у тым ліку псіхалагічную.
4 жніўня 438 украінскіх вайскоўцаў з-за абстрэлу вымушаныя былі адступіць на тэрыторыю Расіі. Пазней амаль усе яны вярнуліся ва Украіну. 8 жніўня суд расійскага гораду Красны Сулін Растоўскай вобласці арыштаваў на два месяцы пецярых украінскіх вайскоўцаў 72-й брыгады.
9 жніўня ў Следчым камітэце заявілі, што вернуць афіцэраў ва Украіну без выстаўлення абвінавачанняў.
Фота: REUTERS
