Беларускі музыка Генадзь Лоска выпускае ў Польшчы другі альбом
Музыка, вядомы польскай публіцы як Gienek Loska, выпускае разам са сваім гуртом Gienek Loska band другі альбом пад назвай “Dom”.
На прылаўках польскіх крамаў ён з’явіцца 16 красавіка, паведамляе інтэрнэт-старонка гурта.
Першы альбом гурта “Hazardzista” выйшаў напрыканцы 2011 года. Нейкі час ён уваходзіў у пяцёрку найлепш прадаваных альбомаў у Польшчы і атрымаў статус “залатога альбома”.
Перад гэтым беларус стаў у Польшчы пераможцам першага сезона музычнага конкурсу “Х–Factor”.
Генадзю Лоску 38 гадоў. Ён нарадзіўся ў Белазерску, на пачатку 90-х пераехаў з Гродна ў Варшаву разам са сваім гуртом “Seven B”. Пасля заснаваў сольны музычны праект, які, аднак, сур'ёзнага камерцыйнага поспеху не меў. Да перамогі ў конкурсе зарабляў тым, што граў на вуліцах Варшавы.
Фота — gienekloskaband.art.pl
