Беларуская зборная прапусціла ад чэмпіёнаў свету толькі адну шайбу
Аднак сама не закінула ніводнай, таму і саступіла фінам — 0:1 (0:1, 0:0, 0:0).
Адзіная шайба на рахунку Ніскала (20-я хвіліна). Толькі ў канцы трэцяга перыяда беларускія хакеісты здолелі стварыць сапраўдную небяспеку ля брамы гаспадароў пляцоўкі. Выдатны момант быў у Кальцова. Апошнія дзясяткі секундаў беларусы гулялі без Коваля (ён, дарэчы, выдатна адгуляў матч), але даціснуць фінаў не здолелі.
Па кідках беларусы саступілі фінам амаль удвая: 21:38 (2:13, 12:13, 7:12). Больш у нашай каманды і штрафнога часу: 14 на 8.
Нагадаем, у іншых матчах першага тура хакейнага чэмпіянату свету былі зафіксаваныя наступныя вынікі:
ЗША — Францыя — 7:2 (1:1, 3:1, 3:0), Нямеччына — Італія — 3:0 (1:0, 1:0, 1:0), Канада — Славакія — 3:2 (1:0, 2:1, 0:1), Чэхія — Данія — 2:0 (0:0, 1:0, 1:0), Швецыя — Нарвегія — 3:1.
Наступны матч зборная Беларусі правядзе 6 траўня супраць Швейцарыі.
