Ежы Бузэк: Беларусь можа страціць заходнія крэдыты

Калі нашы ўлады не зменяць тактыку дзеянняў адносна грамадзянскай супольнасці, то Беларусь можа больш не атрымаць заходніх крэдытаў.

Пра гэта заявіў старшыня Еўрапарламента Ежы Бузэк падчас сустрэчы ў Варшаве з лідэрам руху "За Свабоду” Аляксандрам Мілінкевічам. Ён адзначыў, што санкцыі — гэта магчымасць, якая вісіць у паветры.

Ежы Бузэк: “Сёння важны момант для адносін Еўрасаюза з Беларуссю. Беларускія ўлады павінны зразумець, як шмат могуць страціць з-за нешанавання правоў чалавека і невыканання ўмоў, якія дзейнічаюць у дэмакратычным свеце”.

Супраць палітыкі кампрамісаў выказаўся і Аляксандр Мілінкевіч. На яго думку, атака на Саюз палякаў не мае на мэце нацыянальнага прыгнёту польскай меншасці, а хутчэй з’яўляецца праявам ціску на ўсю грамадзянскую супольнасць.

Калі ідзе гаворка пра правы чалавека, паўплываць на беларускія ўлады могуць толькі рашучыя эканамічныя крокі Еўрасаюза. То бок — невыдаванне ўладам чарговых крэдытаў.

Аляксандр Мілінкевіч: “Я не вельмі люблю слова санкцыі. Я кажу не пра іх, а пра спыненне дапамогі. То бок Еўрасаюз, напрыклад, кажа беларускім уладам: “Калі вы ідзеце шляхам еўрапейскіх стандартаў, мы падтрымліваем вашую гаспадарку”. Фінансавая дапамога павінна залежаць ад канкрэтных крокаў па лібералізацыі. Ёсць крокі — ёсць дапамога”.

Жаданне паправіць сітуацыю з нешанаваннем правоў чалавека ў Беларусі ўсімі магчымымі сродкамі выказаў і Ежы Бузэк. Ён паабяцаў, што следам за рэзалюцыяй Еўрапарламента на наступным тыдні з’явіцца і рэакцыя іншых еўрапейскіх інстытутаў.

Ежы Бузэк: “Пэўныя добрыя жэсты з боку беларускіх уладаў скончыліся. У Беларусі наступіла замарозка дэмакратызацыі, і на гэта павінен быць адказ. Думаю, што не толькі ад Еўрапарламента, а таксама і ад іншых інстытутаў”.