Каб выступіць у Мінску, "Нейра Дзюбель" вырашыў змяніць назву
Пасля трох няўдалых спробаў перанесці канцэрт з “Лофта” ў іншы сталічны клуб арганізатары вымушаныя былі адмовіцца ад мерапрыемства.
Лідэр гурта Аляксандр Кулінковіч аргументуе такое рашэнне “чорнымі спісамі”.
Кулінковіч: “Натуральна, “чорныя спісы” і забароны. Наколькі я ведаю, да арганізатараў прыйшлі людзі і сказалі, што канцэрт не мусіць адбыцца. А яны, вядома, не даюць сабе клопатаў ніколі нічога аргументаваць. Дый мы жывем не ў той краіне, дзе нешта трэба тлумачыць. Не — і ўсё! Нельга! Да пабачэння”.
Цягам тыдня музыканты разам з арганізатарамі спрабавалі знайсці сабе іншую пляцоўку для выступу. І нават думалі замяніць назву гурта.
Кулінковіч: “Спачатку просто спрабавалі перанесці яго ў іншае месца. Пасля вырашылі перанесці дату. Пасля паспрабавалі трэці варыянт — нават змяніць назву! Каб гэта быў не Нейра Дзюбель. Але мы пацярпелі поўную няўдачу па ўсіх трох пунктах. Ні змена месца, ні змена даты, ні змена назвы не дапамаглі нам”.
