На мадэрнізацыю польска-беларускай мяжы грошы дадуць швейцарцы
Дадатковы 61 мільён злотых (каля 20 мільёнаў долараў) атрымае Падляскае ваяводства.
Гэтыя сродкі пойдуць на рамонт і мадэрнізацыю польска-беларускага памежнага пераходу Полаўцы — Пясчатка. Мадэрнізацыя пераходу фінансуецца са сродкаў польска-швейцарскай праграмы супрацоўніцтва. 51 мільён злотых ад агульнай сумы будзе прадстаўлены швейцарскім бокам.
Як паведамляе Kurier Poranny, будуць пабудаваны будынкі мытна-пашпартнага кантролю і восем каналаў адпраўлення пасажыраў. Акрамя гэтага мытныя службы набудуць неабходнае для іх працы абсталяванне, у тым ліку рэнтген для грузавікоў.
Зараз пераход Полаўцы-Пясчатка могуць перасякаць толькі легкавыя аўтамабілі беларусаў і палякаў. Пасля рэканструкцыі праз пераход змогуць ездзіць грузавікі і пераходзіць пешшу грамадзяне розных краінаў.
Заканчэнне мадэрнізацыі пераходу запланавана на другую палову 2014 года.
