Салідарныя Каляды ля Акрэсціна скончылася затрыманнямі
Паўтара дзесятка чалавек прыйшлі сёння прыкладна а 19.00 да Цэнтра ізаляцыі правапарушальнікаў ў Мінску.
Яны запалілі свечкі, спявалі калядныя і малітоўныя песні. Такім чынам, людзі вырашылі падтрымаць затрыманых 19-20 снежня ў Мінску, павіншаваць іх з Калядамі.
Супрацоўнікі міліцыі ў цывільным папярэджвалі, што мерапрыемства не санкцыянаванае ўладамі і заклікалі разысціся.
Калі ўдзельнікі акцыі сапраўды пачалі разыходзіцца, пад'ехаў аўтазак і супрацоўнікі міліцыі ў цывільным затрымалі каля пяці чалавек.
Куды даставілі затрыманых і што ім інкрымінуецца, пакуль невядома, перадае БелаПАН.
Вядомыя імёны двух затрыманых - гэта Вольга Дамарад і Міхаіл Мацкевіч. Верагодна, што затрымалі таксама Алеся Кіркевіча.
