У амерыканскім штаце Невада моцныя лясныя пажары
Каля 10 тысяч чалавек вымушаныя пакінуць свае дамы, бо ім пагражае небяспека.
Агонь распаўсюджваецца на ўсё большыя тэрыторыі, полымем ахоплена ўжо болей за 800 гектараў. Адзін чалавек загінуў, 16 трапілі ў лякарню. Адзін з пажарных атрымаў сур’ёзныя апёкі. Згарэла болей за 25 дамоў, тысячы жыхароў штата засталіся без электрычнасці.
У некаторых раёнах агонь удалося лакалізаваць, бо пайшоў снег. Аднак у іншых мясцінах вецер з хуткасцю ў 97 кіламетраў на гадзіну нясе полымя далей і да таго ж перашкаджае верталётам пажарнай службы ўзняцца ў паветра, перадае ВВС.
