У Маладзечне за Народны сход пагражаюць “цяжкімі наступствамі”
Напярэдадні 12 лістапада, калі павінны прайсці чарговыя Народныя сходы, супрацоўнікаў некаторых прадпрыемстваў пачалі папярэджваць.
Дырэктар маладзечанскай швейнай фірмы “Юнона” Уладзімір Іваноў заявіў сваім работнікам, што ў суботу знаходзіцца на Цэнтральнай плошчы горада ім забаронена. У іншым выпадку яны будуць звольненыя неадкладна, у панядзелак. Многія шчыра здзіўляліся, з чым звязана такая забарона, але ніхто нічога не тлумачыў, паведамляе праваабарончы цэнтр “Вясна”.
Маладзечна, дарэчы, пакуль не ўваходзіў у геаграфію гарадоў, дзе арганізоўваліся Народныя сходы.
На СП “Мінскі мэблевы цэнтр” супрацоўнікам адкрыта не пагражалі, але толькі “намякалі”. У калектыве распаўсюдзілі інфармацыю, што прозвішчы ўсіх, хто з’явіцца на плошчы ў суботу, адразу стануць вядомыя дырэктару.
